「寸王」赢多一场就可以成为英超「百胜..

英超上演「车曼大战」，「寸王」赢多一场就可以成为英超「百胜教头」，如果喺呢个特别日子砌低「红魔鬼」，意义肯定更重大，况且佢件爱将夏萨特近期Fit到漏油，对住甩皮甩骨兼由「反派小三」莫耶斯领军嘅曼联可以秤先，车路士让半一捧上盘。

（now621台周一凌晨0:00直播）

车路士呢期破纪录破到唔识停，继门将施治上星期以209场清白身，打破球会名宿、外号「飞猫」嘅邦纳迪嘅不失球场数纪录后，今晚就轮到莫连奴「骚哥利」。「寸王」带领车路士征战英超141场赢足99场，今晚只要搞掂埋曼联，就会成为英超「百胜教头」，赛前「Special One」贯彻牙擦作风，话明「今场就要达标」。

莫耶斯访Big4未赢过

查实莫帅咁有信心又唔係冇道理嘅，因为车仔最弱嗰环防中位置问题已经解决咗，以2,100万镑由宾菲加回巢嘅尼曼查马迪，赛前话自己够状态可以担正，有呢位去季葡超MVP同拉美利斯做「扫把佬」，曼联班攻击球员肯定冇啖好食。「蓝战士」近期连赢4场联赛，就连费托都咸鱼翻生，连续两轮英超有波入，最重要係中场夏萨特状态大勇，单係对上8仗，就贡献咗5球同3次助攻，统计网站Opta更显示，佢今季为队友製造咗冠绝英超嘅50次埋门机会，问你怕未！

咁点解莫耶斯係「反派」呢？皆因每次遇上大战都要反佢嘛！呢条苏格兰佬喺英超时代46次带队造访传统Big4（曼联、车路士、利物浦、阿仙奴）都未赢过，当中12次去到史丹福桥只得6和6负，点睇都唔似係「寸王」对手！係，落场嘅係球员唔係领队，但曼联最做得嘢嗰位朗尼，喺英国时间礼拜四由埃及归队后，军医仲係对佢嘅鼠蹊伤势唔乐观，《衞报》仲话「魔童」要抖多3周，另一件射手尹佩斯同左闸艾拉又分别因大腿同膝伤缺阵，攻守两瓣都唔掂，点计都係车仔高啲啦！

乜都玩锦囊： 跟往绩博半场0:0

车路士今季表现慢热，往往都喺下半场先至嚟料，就讲近3场吖，即使对手只係修咸顿、打比郡同侯城，「蓝战士」都係要去到下半场先打破僵局。睇埋往绩，对上3次「车曼大战」都係半场窿窿，2.1倍半和同2.45倍半场0:0波胆都玩得过。

Data King：曼联砌车例食白果

曼联近3次对车路士都入唔到波。

双方近4次喺史丹福桥交手产生咗5个12码。

车路士近5次斗曼联录2胜3和。