西布朗今晚喺山楂球场迎战爱华顿

山楂具有健脾开胃嘅效用，不过西布朗今晚喺山楂球场迎战爱华顿，现时阵中状况刚好同山楂效用相反，箭头沙恩朗赛前投奔侯城不特止，安历卡最近被赞助商下令封杀，前线人脚捉襟见肘，睇嚟难阻要抢分争取欧联入场券嘅「拖肥糖」赢波，一于撑2.03倍客胜。

（now621台周二凌晨4:00直播）

法国射手安历卡上月底喺联赛做出疑似「纳粹」手势，事件搞到满城风雨，至今事隔半个月有多，但仍然冇解决迹象，英格兰足总强调已聘请专家帮手调查，反歧视团体Kick It Out则嫌进度缓慢及欠缺透明度向足总施压，至于最新鲜滚热辣嘅消息，则係波衫心口赞助商Zoopla扬言今晚见到安历卡落场嘅话，将会即时终止赞助合约咁话。

迪斯甸复出无后顾之忧

虽然唔知西布朗係咪会同「钱」途对着干，但实情安历卡自从「纳粹风波」发生后哑晒火，落到场都未必帮到手。至于喺西布朗孭飞多年嘅爱尔兰国脚沙恩朗，赛前落实投奔侯城，安尼捷比同施斯隆又话要抖，前线倚靠马迪维达同比拉希奴两件生牯仔搵食，今战处子登场嘅新帅梅尔，怕且几难有个好开始。

爱华顿同西布朗一样，赛前有箭头谢拉域转投侯城，好在该克罗地亚国脚今季已非必然主力，影响远低于对手。就算英格兰新星巴克里拇趾骨折避战，但巴利、奥士文、米拿拉斯等中场悍将足够弥补空缺外，被腿筋伤患缠扰三个星期嘅守将迪斯甸，今场能够复出扼守中路，亦令防线更为稳固。

况且「拖肥糖」防线并非独沽一味识得守，巴尼斯、史密斯高文同白赖仁奥维度喺今季联赛合共贡献10球，入球量媲美西布朗5名前锋嘅总和，加埋前线有「小魔兽」卢卡古担正数胡，今晚要撕破自后衞比利锺斯眼伤避战后，连续两场都吞蛋输波嘅西布朗，真係话都冇咁易！

Data King西布朗近11场联赛仅1胜

双方近6次对垒，爱华顿录得4胜1和1负较佳成绩。

西布朗近11场联赛仅得1胜，其馀10场录得5和5负。

乜都玩锦囊 半场波胆「0:0」博得过

西布朗陷入前锋荒，爱华顿防线无后顾之忧，相信可以睇定嚟食，而「拖肥糖」今季每逢作客前半段惯性谨慎，今季10场有8场同对手「煎双蛋」返入更衣室，今场不妨再追2.6倍「0:0」半场波胆。