上季季尾曼聯大跌Watt，獲得長約嘅主帥蘇斯克查備受質疑

青春風暴堅有火
今晚英超獨腳戲，弗到漏油嘅曼聯作客狼隊。紅魔由主帥蘇斯克查掀起嘅青春風暴，喺首輪大數車路士4粒，年輕球員堅有火係威係勢，不過狼隊亦非善男信女，主場出擊唔會做縮頭烏龜，加上近年交手例演入球騷，2.5球嘅大盤有買趁早。

（Now 621周二凌晨3時直播）

上季季尾曼聯大跌Watt，獲得長約嘅主帥蘇斯克查備受質疑，不過季中先接手做到嘅嘢好有限，去到今季佢放手一搏，按照自己嘅思路調整球隊。首先係重用年輕球員，而且放喺啱嘅位置，並多打反擊戰術，充分發揮出「福仔」拉舒福特、連格同安東尼馬迪爾嘅速度優勢，防中兼青訓產品麥湯米尼大範圍嘅搶截，從而解放保羅普巴，令進攻更加立體，後備席仲有丹尼爾占士、格連活特等生牯仔候命，首輪大勝車路士4比0，擺脫前幾季個個企住等波踢嘅hea樣，眾將會透過不斷跑動幫波，逼到對手斷纜連隨反擊，呢點就係多用年輕球員嘅優點。

狼隊極速上力入到波
另一邊廂，首輪聯賽打和嘅狼隊，因為要踢歐霸外，早早開操極速上力，連季前熱身賽在內，近7仗取得5和2和未輸過，包括歐霸外第3圈兩回合計狂數佩歷克8比0，魯爾占美尼斯、迪亞高祖達、魯賓尼維斯等個個有波入，火力全開唔講得笑，今仗主場出擊更加唔會縮。何況兩軍每次碰頭，都踢到飛沙劈石，近8次交手有7次總入球3球或以上，2.5球嘅大盤有分頭，乃不二之選。