今晚德甲獨腳戲上演萊茵河打吡

德甲史上首場閉門作賽
今晚德甲獨腳戲上演萊茵河打吡，慕遜加柏主場迎戰科隆。慕遜加柏上輪聯賽不敵多蒙特勁唔抵，教練馬高路斯聲言今晚要出氣，遇上防線人腳唔齊嘅科隆，黑柴推介慕遜加柏讓半一嘅上盤。

（Now 670、FOX+、有線651及611台周四凌晨1時30分直播）

基於新冠肺炎疫情影響，賽會尋日公布今仗要閉門作賽，亦係德甲史上首場閉門作賽賽事。慕遜加柏上周末主場1比2輸畀多蒙特，搞到聯賽榜4哥位置都畀利華古遜搶埋，但該仗係慕遜加柏今季其中一場代表作，全場形勢甚至比多蒙特更好，可惜欠運之餘，莊拿斯荷夫曼一次畀對方門將路文貝基侵犯亦未獲應得嘅12碼，最後冇分落袋非常氣憤。

教練馬高路斯賽後話，佢哋仲有呢場補賽喺手，今晚有決心攞晒3分搶番前4位置，即使有中場主力科利安尼奧侯斯停賽，但箭頭馬古斯杜林傷愈復任正選，接連喺主場出擊，體力亦佔優勢。

科隆防線唔齊腳難捱
講近績科隆甚至喺慕遜加柏之上，近10場德甲贏咗8場，聯賽榜由尾3回升到中游第10位，不過主帥基斯度亦承認，佢哋同慕遜加柏級數仍然有別，今仗只能盡力而為，何況後防大將施巴斯坦波拿奧同隊長祖拿斯赫達都因大腿肌肉受傷缺練，上陣機會唔樂觀，連同養緊傷嘅薛祖斯同卡達巴治，防線人腳唔齊，要抵擋慕遜加柏強攻相當吃力。