重臨福地曼聯霸氣寧人

近排氣勢如虹嘅曼聯，歐霸16強首回合作客寧斯。紅魔鬼冬季轉會窗兩個收購波基斯費南迪斯同恩哈路表現對辦，「波費」激活曼聯整條進攻線，連安東尼馬迪爾都翻生埋，球隊近5戰4勝1和，作客福地奧地利可以添食，小讓平半上盤抵玩。（myTV Gold303、Now643、有線656及616台周五凌晨1時55分直播）

曼聯32強淘汰布魯日後，抽中奧地利新貴寧斯。值得一提的是，布魯日同寧斯曾經喺今屆歐聯附加賽碰頭，布魯日兩回合計以3比1淘汰寧斯，寧斯撞正如日方中嘅紅魔鬼，應該比布魯日更難打。

寧斯兩主力後衞停賽
寧斯首次躋身歐霸分組賽即入16強，已超額完成，教練伊斯梅曾喺1998年效力水晶宮，當然明白曼聯有幾多斤兩，後衞出身嘅伊斯梅必定要求球隊先做好防守，但今場佢哋兩名主力後衞菲臘維辛格同比達菲臘普域停賽，後防殘陣更難頂得住曼聯

曼聯新勝曼城，近5場4勝1和。波基斯費南迪斯同恩哈路喺呢5場各自入3球，連之前沉咗一排嘅安東尼馬迪爾都被激活有士哥，「波費」嘅舖橋搭路絕對要記一功。此外，曼聯對奧地利球隊有一手，過去8次交手獲7勝1和，而且從未喺奧地利失過波，再臨福地當然值得支持。