英超重心：摩佬大巴陣已out 紅軍穩做「刺」客(一)

英超重心：摩佬大巴陣已out 紅軍穩做「刺」客

周六英超焦點，摩連奴帶領的熱刺主場鬥不敗之師利物浦。熱刺自摩帥入主後鬥勁旅包括曼聯及車路士等都敗陣，球隊防線脆弱，料今仗摩佬勢再「泊大巴」；所謂久守必失，缺射手哈利卡尼的熱刺難爆冷，利物浦讓半/一，必捧上盤。

自去年12月初作客敗走曼聯後，摩連奴入主熱刺後的蜜月期似已過，近期受傷兵困擾下，各項賽事已三場不勝，上周英足盃「夫添」作客英冠米杜士堡，幾經辛苦才1:1逼和對手，今鬥聯賽11連勝的利物浦，相信熱刺縱佔主場之利，也肯定不會與紅軍鬥攻。

事關曾玩弄紅軍中堅洛夫雲的熱刺射手卡尼，因左腳腿筋肌腱撕裂，確認要四月才能復出，令摩佬要在轉會市場另覓射手，盛傳目標是AC米蘭中鋒比亞迪克；另外兩名中場尼當比利及穆沙施素高今仗亦缺陣，後者也要養傷至四月，摩佬排陣更頭痛；此外，在英足盃摩佬對英冠隊時竟起用三中堅陣式，似為今仗「泊大巴」演練。

卡尼重創右路缺口大

只是摩連奴這套「大巴陣」已失效多時，早前熱刺對曼聯及車路士等，不論主客都落敗，其中鬥藍軍一役更見右閘奧里亞漏洞甚多、門將加沙寧加踢大戰不夠穩健，相信剛當選非足先生的沙迪奧文尼，勢與紅軍左閘安德奴羅拔臣重點攻擊熱刺右路。

紅軍三大將有望披甲

相對熱刺傷兵滿營，利記今仗卻有法賓奴泰華利斯、梳頓沙基利及祖爾麥迪比三名大將有可能復出，加上前線三叉戟上仗英足盃休息，再有新兵南野拓實、默郡打吡一箭定江山的居迪斯鍾斯等待上位，陣容明顯較完整，就算久攻不入亦有本錢變陣。

紅軍今季在英超所向披靡，早前作客次席的李斯特城都贏四球，剛有高普及阿歷山大阿諾特分獲12月英超最佳領隊及球員的紅軍，今仗就算作客也有力再贏，延續英超不敗氣勢；紅軍上季在大幅度領先下失冠，目前就算領先達雙位數字積分，亦肯定不會掉以輕心，定希望在歐聯淘汰賽再開前在聯賽盡量搶分，今仗紅軍讓半/一捧上盤。