話足球猜比分如何咁快新一季西甲今晚開鑼

西甲開鑼搶頭炮
抖咗唔夠2個月，話咁快新一季西甲今晚開鑼，不過兩大豪門皇家馬德里同巴塞隆拿下個星期先有波踢，開咧日焦點就落喺CF格蘭納達主場硬撼畢爾包。雙方實力半斤八両，不過畢爾包自從傳奇射手阿度里斯掛靴後，攻力削弱，況且格蘭納達近年主場出擊食住「巴斯克雄獅」，今仗有力打響頭炮，平手盤揀主隊啱數。（Now 632周日凌晨零時30分直播）

畢爾包一向重用巴斯克土炮，其中箭頭阿度里斯老而彌堅，創下連續15季喺西甲取得入球嘅紀錄，拍住巴塞球王美斯，當中有11季效力畢爾包，可惜呢位39歲「獅王」飽受傷患困擾，上季停擺期間宣布掛靴，令「巴斯克雄獅」冇咗進攻支點，上季復賽後11場聯賽贏得4仗，痛失歐霸入場券。畢爾包今夏未有喺鋒線爭兵，焗用狀態飄忽嘅蒙尼恩及伊拿基威廉斯，不宜高估。

相反，格蘭納達上季後勁凌厲，憑住最後6輪獲4勝1和1負，成功趕及搭上歐霸尾班車。雖然新兵佐治摩連拿因確診新冠肺炎缺陣，但老將蘇爾達杜、達雲馬捷斯及中場佩亞達斯有一定入球效率，相信影響唔大，加上格蘭納達近4次主場迎戰畢爾包，取得3勝1負，包括上季大勝4比0，有往績支持，格蘭納達平手盤值得。

皇馬縮皮拉莫斯帶頭減薪
另邊廂，皇馬今晚冇波踢之餘，喺今夏轉會市場都冇搞「大deal」。近日西班牙傳媒更爆料，皇馬再向陣中主力開刀，要求全隊減薪3成。其實早喺上季停擺期間，皇馬已經減過一次人工，新一季打算繼續減，據悉代表球員談判嘅沙治奧拉莫斯已帶頭答應。佢本人稅後年薪高達1,500萬歐元（約1.37億港元），同皇馬尚餘1年合約，拉莫斯打算大幅調低薪金，減薪3成即係減到1,050萬歐元，再同皇馬續約，希望喺「銀河艦隊」掛靴。