開季唔順嘅曼聯今晚壓軸戰作客紐卡素

隊長變炸彈
開季唔順嘅曼聯今晚壓軸戰作客紐卡素，曼聯國際賽前災難性咁輸場1比6，今晚最緊要穩住後防，但隊長哈利馬古尼慌失失表現延續到國家隊，都唔知醒番未。「喜鵲」每逢主場對曼聯特別專注，近4次錄得2勝1和，受讓半一必捧下盤。

（Now 621周日凌晨3時直播）

曼聯喺國際賽前經歷「奧脫福慘劇」，主場畀熱刺以6比1蹂躪，仲有安東尼馬迪爾領紅牌今場停賽。由於夏季轉會窗羅致嘅卡雲尼要隔離14日，格連活特有望擔大旗，不過球員欠鬥心及集中力不足，先係曼聯開季脫腳嘅主因。

上仗大敗畀熱刺，中路守將哈利馬古尼同艾歷拜利頻頻出錯，其中馬古尼踢國際賽繼續慌失失，搞到英軍喺歐國聯踢少個輸波。呢位「紅魔」隊長自從喺希臘涉嫌醉酒打人後，一路都未好過，場內場外信心盡失，主帥蘇斯克查用唔用佢都左右為難，就算域陀連迪路夫可取代艾歷拜利，後防依然冇信心。

紐卡素防守硬淨
紐卡素開季表現穩定，4戰錄2勝1和1負，雖然入得6球，但亦只失5球，防守力唔曳。「喜鵲」主場鬥曼聯向來醒神，近4次喺聖占士公園球場交手僅曾1敗，遇正低潮嘅曼聯有力踩多一腳，隨時贏埋都仲得，主場受讓極度抵玩。