阿特蘭大主場迎戰卡利亞里

地頭夠鑊氣
今晚意大利盃16強尾場，阿特蘭大主場迎戰卡利亞里。阿特蘭大狀態大勇，伊利錫自復出後愈來愈弗，將棄用艾真度高美斯嘅影響減到最低，何況佢哋主場出擊例必大炒，遇上心繫護級嘅卡利亞里，讓2球都冇有怕，直取讓球主勝。（周五凌晨4時15分開賽）

阿特蘭大進攻核心艾真度高美斯，早前因同主帥加斯柏連尼吵大鑊而遭雪藏，冬窗走人似乎難以避免，但佢嘅空缺，正好由伊利錫填補番。

伊利錫撻着激活鋒線
伊利錫上季經歷疑似「綠帽」事件後，一度消失未有比賽，好彩呢位斯洛文尼亞老將自上年10月復出後，狀態不斷冒升，聯賽上陣10場入2粒同交出5次助攻，上場大勝賓尼雲圖4比1，佢亦有入波同貢獻助攻，全場作出6次射門及交出7次具威脅傳送，幾乎一個玩晒，甚至有網站畀10分滿分佢添，果然薑愈老愈辣，難怪踏入2021年，阿特蘭大連贏3場狂轟12粒，重拾進攻大過天嘅風格。

卡利亞里雖有比利時悍將尼恩高蘭回巢，但戰績未見起色，已經連續9場未贏過，單計新一年踢咗3場聯賽全部輸晒，包括上仗對住費倫天拿，打到雜亂無章，進攻只得高空轟炸，最終輸0比1亦無話可說，依家護級形勢水深火熱，實在無暇兼顧盃賽。何況阿特蘭大主場出擊特醒，近4次主場贏晒之餘，每場至少贏3球，堅有鑊氣，遇上留力聯賽護級嘅卡利亞里，讓球主勝值得捧場。