愛華頓值得跟進

狼隊防線穿窿
兩支喺英足盃晉級嘅球隊狼隊同愛華頓今晚對碰，狼隊一向以防守耍家聞名，但今季呢支笛吹唔響，後防甩漏甚多，近10場聯賽場場失波，愛華頓經過一輪調整，傷疲盡起，今場可以夫添搏殺，平手盤捧「拖肥糖」。

（Now 621周三凌晨4時15分直播）

狼隊呢排真正係「攻不銳、守不穩」，自魯爾占美尼斯養傷後，成個穩守突擊體系好似崩潰咗咁，一向入波已經唔多，依家再死多啲火。前面冇咗進攻焦點，後邊亦頻頻出現甩漏，領隊紐奴不論用4人防線，抑或3中堅陣式，都冇咗上季銅牆鐵壁嘅感覺，近10場聯賽竟然全部有失球。

愛華頓上輪聯賽主場不敵韋斯咸0比1，英超4連勝告終，但上周末英足盃加時淘汰洛達咸，算係及時反彈。其實愛華頓喺英超表現不俗，16戰得29分排聯賽第7，少踢一場之下只係落後榜首利物浦4分，嚴格來說，仍屬爭標分子之一。

「拖肥糖」今場最大優勢，係佢哋克服晒所有傷停問題，領隊安察洛堤可以排出最強陣容，占士洛迪古斯回歸，同基菲爾施古臣組成雙核中場，增加球隊組織力，李察利臣嘅速度可助前鋒卡維特利雲衝擊對手防線，加上佢哋近4場聯賽作客，獲3勝1和佳績，愛華頓今場可坐和望贏。