水晶宮主場鬥韋斯咸

今晚英超另一場早場由兩支倫敦球隊交鋒，水晶宮主場鬥韋斯咸；水晶宮近況平平，而且主力射手韋費特沙夏續有傷上陣成疑，主場出擊相信都唔敢冒進；韋斯咸近期作客大踢穩陣波，聯賽連盃賽近7場作客有6次開半場和，不妨再追多次。

（Now 622周三凌晨2時直播）

水晶宮上場聯賽淨吞曼城4蛋，聯賽連盃賽近9場1勝4和4負，唯一勝仗對手係聯賽包尾嘅錫菲聯，狀態唔算理想，上場因傷缺陣嘅韋費特沙夏未完全康復，今戰上陣成疑，對連續3場冇入波嘅水晶宮嚟講更加雪上加霜，雖然球會早前由德甲緬恩斯借入法國前鋒桑馬迪達，但呢名23歲射手首次踏足英超，相信亦需時適應，未必能即時起到作用。

韋斯咸賽程密未回氣
韋斯咸上場英足盃主場大勝唐卡士打，各項比賽5連勝氣勢如虹，不過佢哋周末比水晶宮多踢一場，體力上或有輸蝕地方，睇番佢哋近2次作客贏波都係小勝1比0，而且對上7場作客有6次開出半場和，預計今場都係先做好防守，留待換邊後先發力，一於再追半場和。