墨爾本勝利主場迎戰珀斯光輝

連續2場開7+
星期二澳職「大」戰，墨爾本勝利主場迎戰珀斯光輝，兩支球隊都係進攻型打法。作客嘅珀斯光輝喺遲來嘅開咧戰製造入球盛宴，主場以5比3大破阿德萊德聯，上仗作客西部聯再以4比5落敗，頭2場聯賽即炮製17個入球，連續2場總入球7+，有前冇後踢法極明顯。主隊墨爾本勝利亦急於喺主場開齋，預料戰情會非常開放，2.5球入球大值得睇好。

（myTV SUPER周二下午4時05分直播）

勝利強陣鬥攻
墨爾本勝利上仗作客阿德萊德聯0比1輸波，今季頭2場均落敗而回，今場希望喺主場打開今季勝利之門，賽前佢哋亦收到喜訊，兩大進攻主力羅比古斯同馬高洛查士均已擺脫傷患，今場可以候命搏殺，加上英格蘭球星卡林麥馬拿文加盟後表現對辦，勝利嘅攻擊線稱得上星光熠熠。事實上，勝利踢法一向大開大合，近5場賽事有4場總入球開3球或以上，入球有保證。

光輝季初面臨嚴重兵源問題，施巴斯坦蘭甘同太田宏介兩名守將仍未可以報到，不過光輝就以強大火力彌補，科拿路利同安迪基奧治兩大老將威力依然，加上歷克迪亞高斯天奴狀態大勇，今場更有進攻鎖匙人迪亞高卡斯度傷愈，攻擊力相當強大。勝利同光輝都以強攻踢法為主，而且近6次聯賽交鋒，有4次總入球達到3球或以上，今場2.5球入球大好路。