今晚深夜意大利盃8强有睇头，由施多夫领军嘅ＡＣ米兰再上征途

好攻施多夫继续练靶

今晚深夜意大利盃8强有睇头，由施多夫领军嘅ＡＣ米兰再上征途，主场对乌甸尼斯。施多夫处子骚成功响头炮，佢嘅进攻足球理念好受球员欢迎，连一向牙眨眨嘅巴洛迪利都话心悦诚服。呢位荷兰少帅推行华丽战术奏效，继续狂攻对手。乌甸尼斯联赛捲入降班漩涡，无心恋战盃赛，势成施多夫练靶场，直取让球主胜。

（now 633及660周四凌晨4时直播）

施多夫球员时代司职中场指挥官，体内充满进攻细胞。最重要係老闆贝鲁斯干尼锺意睇悦目足球，施多夫新官上任当然识做，报答对方提携，上仗狂轰维罗纳，控球率达7成，全场有25次射门，多对手足足一倍，如果把握力好啲绝对唔止赢一粒。

事实上，AC优秀球员集中喺中前场，进取型战术比较有利巴洛迪利、卡卡、罗宾奴、本田圭佑等好手发挥，展现球队强项。经过上仗「热身」后，预料今仗进攻演出会更佳。

乌甸留番啖气护级

乌甸尼斯上圈意盃淘汰国际米兰，全因对手更不济，乌军近两场联赛全败，劲失6球，先至係佢哋原本水准。特别係上仗领先1球兼打多1人之下，最终竟然输2比3畀拉素，认真打击士气。乌甸现时喺联赛仅比排尾3嘅萨斯索罗多3分，随时跌入降班区，首要目标係保住甲组位，争意盃对佢哋而言太奢侈，教练古度连今仗或派副选应战，ＡＣ仲唔嗒晒糖咩。