西布朗新帅梅尔领军第一击要喺英超主场恶战爱华顿

上任即遇「安历卡事件」有危就有机

西布朗新帅梅尔领军第一击要喺英超主场恶战爱华顿，决心打响头炮，佢一上任就面对射手安历卡纳粹庆祝手势争议，若然处理得好，绝对可以转危为机提升民望。「拖肥糖」缺少今季弗到爆嘅中场新星巴克里，作客让波牙烟，博让球主胜！

（now 621周二凌晨4时直播）

安历卡纳粹庆祝手势事件近期成为英伦热话，各方要求英格兰足总严惩，消息指足总初步计划罚佢停赛五场，连赞助商都施压要西布朗弃用呢位法国射手，气氛都几紧张。梅尔一嚟到就要解决呢镬麻烦嘢，领队教波难，但处理危机应变力其实更考工夫，稍一不慎会严重打击士气。梅尔新官上任，唔可以得失班兵，相信都要撑安历卡，藉此赢得更衣室上下信任，当然，最紧要係掌握球会幕后人心态，如能摆平呢次危机，肯定加晒分啦！

爱华顿冇巴克里难作恶

西布朗喺一月转会窗刚放走箭头沙恩朗，前线可用兵源唔多，顺理成章重用经验丰富嘅安历卡，而由于前爱华顿前锋安尼捷比受伤患困扰，新星比拉希奴势将获得重用。至于爱华顿新兵艾登麦基迪今战有机会首度登场，呢隻快翼突破能力甚强，有力提升球队侧击力，但中场重心巴克里仍未好番，肯定无法披甲，将会大大削弱球队组织力，要作客赢波唔易，让波绝对信唔过！