莫连奴誓喺曼联身上夺取个人英超100W

朗尼尹佩斯No show 红魔等劏

莫连奴誓喺曼联身上夺取个人英超100W！英超大战车路士主场迎战曼联，车仔「寸王」教头莫连奴喺英超累积99W，赛前讲明绝不同情「红魔鬼」主帅莫耶斯，仲话对住呢支衞冕球队会打真军。曼联缺少两大天王朗尼同尹佩斯顿成冇牙老虎，无力反抗，捧车仔主胜！

（now 621周一凌晨零时直播）

现时莫连奴已喺英超取得99场胜仗，只差一场就可到达领队生涯另一里程碑，莫帅话100W必定会来临，但最好係今场搞掂喎！莫连奴本身都唔多锺意莫耶斯，一返车仔就丧撬「红魔」主将朗尼，有心搞到莫耶斯鸡毛鸭血。今场大战前夕，「寸王」仲润莫耶斯有份稳定嘅笋工，得到球会信任，有时间慢慢搞，绝对唔使人同情，潜台词即係唔会留手啦。

尼曼查马迪返车即踢正选

曼联续有王牌进攻组合朗尼同尹佩斯缺阵，全世界都话佢哋依家只係冇牙老虎，但莫连奴偏偏唱反调，强调曼联始终係曼联，仲话今场係对住衞冕球队，危机四伏，真係超畀面囉！相比起车路士，「红魔鬼」进攻系统运作欠顺，日本球星香川真司上场移入中路，中场组织係好咗，两大进攻主力韦碧克同赞奴沙亦交到货，但点都未够卡士赢车仔囉。

车路士刚以高价回购旧将塞尔维亚中场尼曼查马迪，佢会同「红魔」乡里尼曼查维迪成为敌人，莫连奴话唔会搵佢打正选。车路士中场林柏特已经复操，中前场鬼死咁多人用，连曼联迷恨到流晒口水嘅桑马达都要长坐冷板，依家主要伤兵係守将伊云洛域，影响唔大啦。反观曼联后面仲有里奥费迪南及菲尔锺斯等伤兵，连庄尼伊云斯都唔知踢唔踢得，后防穿窿难望抢分。

莫连奴（车路士领队）

我哋面对唔係落后榜首11分嘅球队，而係冠军，我数唔到有几多次曼联能够喺逆境中变得更强。我深信曼联唔会炒莫耶斯，佢做得好好，曼联需要一名长期稳定执教嘅主帅。

莫耶斯（曼联领队）

我哋一直好尽力去签新球员，不过一月唔算係一个收购球员嘅好时机，我唔锺意畀咗希望球迷，到最后一个球员都签唔到，我只可以话我哋冇坐喺度，可以嘅话希望买一、两名新兵。