今晚西甲有场独脚戏，由「黄色潜水艇」维拉利尔主场斗皇家苏斯达

两军藏杀着 西盃先晒冷

今晚西甲有场独脚戏，由「黄色潜水艇」维拉利尔主场斗皇家苏斯达。由于呢两支球队咁啱被抽中喺西班牙盃16强碰头，今场联赛又咁跷夹喺西盃两回合中间，搞到佢哋一个星期要对足三次，双方定必收收埋埋唔肯见真章，「黄色潜水艇」虽有地利之助，但喺战意不明朗下要让到半一实在太辣，不妨捧皇苏嘅下盘。

（周二清晨5时开赛）

或者大家会话，两军都要为前四嘅欧联入场券而战，不过联赛仲有成半季流流长，呢场嘅得失未至于太关键，两队将注意力放喺嚟紧西盃次回合好正常。由于一周要对足三次咁多，双方教头难免会变阵，以求扰乱敌军。

睇番上周中嘅西盃首回合，皇家苏斯达正选收起队长皮亚图及射手卡路士韦拿，而维拉利尔亦未尽全力，只畀前锋佩比后备入替，弗到爆嘅箭头乌捷出都冇出，双方隐藏实力之下结果互交白卷，预计今仗联赛大家会继续收收埋埋，留番喺嚟紧周中嘅西盃次回合先一铺晒冷。

近六对碰和咗四次

其实呢两队可谓半斤八両，之前六次对碰和咗四次，踢落势均力敌，今仗维拉利尔叫做有地利要让到半一，实在有啲过咗火位，皇家苏斯达绝对有力全身而退，斯维认为下盘值得一试。