曼城前锋尼格度今季入球停不了

冇阿古路有「野兽」都掂

曼城前锋尼格度今季入球停不了，绰号「野兽」嘅佢踏入2014年有好多愿望，其中一个就係超越队友阿古路成为「蓝月亮」首席「士哥拿」。呢个机会今晚嚟嘞，曼城会造访近况低沉兼后防唔齐脚嘅纽卡素，相信喺「有偈倾」嘅迪斯高支援下，尼格度实有大把机会入波，曼城让半一捧上盘。

（now621台周日晚10:05直播）

阿古路上个月中打柴之后，都唔知几多人担心曼城会冧档，不过「蓝月亮」打后7场波赢足6场，证明冇阿古路问题唔大。最关键原因係尼格度孭起晒入球重任，迄今所有赛事加埋已经入咗18球，只係落后阿古路1球。适逢「阿Kun」已经复操并落实下场联赛斗卡迪夫城复出，尼格度今仗一定要把握时间达成愿望。

阿Kun复操斗卡城复出

「野兽」赛前向英国《电讯报》话：「2014年我有3个愿望，第1係亮相温布莱，第2係帮曼城捧盃，第3就係要超越阿古路成为曼城首席射手。我知阿古路复出之后会好多波入，所以我更加要把握时间过佢头。」尼格度周中喺英联盃4强首回合大演帽子戏法，帮曼城大炒韦斯咸6蛋，佢透露队友迪斯高开始同佢讲多咗西班牙文，沟通好咗自然有火花。「双塔」今晚又再合作冲锋陷阵，加埋出炉非洲足球先生耶耶托尼足踝伤无大碍可披甲，纽卡素后防肯定有得震冇得瞓。

纽卡素后防残阵

其实睇小「喜鹊」皆因佢哋条防线甩皮甩骨，除咗中坚高洛仙尼长抖之外，右闸迪保治又话要停赛，加埋大衞辛顿大腿受伤未必落场，咁嘅后防点顶得住曼城嘅进袭呀？况且纽卡素最近连输3场，近14次喺英超斗曼城又输足12场，今铺输少球都偷笑。

Data King 纽卡素半场4连和

__双方近8次英超对垒纽卡素输晒。

__曼城近11次同纽卡素喺联赛交手攻入30球，场均入2.7球。

__纽卡素连开4口半场和。

乜都玩锦囊 Yaya专射鹊博首球

唔讲唔知，原来刚啱周中伤咗足踝嘅曼城中场耶耶托尼，至锺意恰「喜鹊」，呢位新鲜出炉嘅非洲足球先生，近4次联赛斗纽卡素，就足足入咗5球，既然「双塔」尼格度同迪斯高二传咁耍家，话唔埋今场又带挈今季劲入波嘅「Yaya」再次射「鹊」，首名入球捧有6倍嘅耶耶托尼好路。