曼联伤兵问题仍然严重，两大射手朗尼同尹佩斯都有伤

苏豪：曼联绝地大反击

莫耶斯命悬一线 焗攻史云斯

为破纪录，「莫耶输」可以去到几尽？踏入2014年，莫耶斯带领曼联3战皆北，上周足总盃第3周轮到史云斯史上首次作客奥脱福赢波，「红魔鬼」今周喺联赛主场再战「天鹅」，「命悬一线」嘅莫帅为保饭碗，必落柯打叫班兵主攻争胜，只係红魔依家士气低落，后防长期不稳，随时入埋唔够输，捧大最稳阵！

（now 621周日凌晨1时30分直播）

后防穿窿士气差

「莫耶输」于2014年继续连环破纪录，曼联先后不敌热刺、史云斯同新特兰，一周3输确实罕见，难怪莫帅被反曼人士捧上神枱，祈求「红魔鬼」管理层继续畀佢领军。曼联依家战术技穷，中场完全冇创造力，一味分边两翼传中，进攻单调，招式畀人睇通晒，两大前锋朗尼同尹佩斯仲抖紧，香川真司始终融入唔到曼联嘅进攻体系，依家只得小将赞奴沙较有惊喜，其馀球员个个踢到冇厘神气。

曼联伤兵问题仍然严重，两大射手朗尼同尹佩斯都有伤，而快翼拿尼、中场费兰尼、守将菲尔锺斯及里奥费迪南等统统有伤，个阵都几残。另外，早前传出季尾将进行大清洗，后防将会係重灾区，搞到人人自危，战意全失。「红魔鬼」目前已被榜首阿仙奴抛离11分，距离第4位利物浦都差成5分，为争前4打欧联，莫耶斯已经别无选择，残阵都要砌，但最怕后防空虚又输反击。

天鹅打反击特醒

史云斯继续缺少王牌中锋米捷，但另一射手韦菲特邦尼近两战入3粒，已经全面上力，不得不防。曼联家阵主场出战冇晒料到，经常都会出现老鼠拉龟情况，条防线仲愈谷愈前，呢种踢法最适合「天鹅」发挥，佢哋反击速度好高，快翼鲁迪治实有大把空间搵食，随时重演上周两破「红魔鬼」大门嘅一幕。

不过，曼联始终係曼联，无论点衰始终唔会褪热，今场主W仅得1.42倍，都係咪掂喇！「红魔鬼」下周联赛要作客车路士，今战会踢得相当进取，赢唔赢到唔知，但一定搏命，「天鹅」亦唔会坐以待毙，你一拳，我一脚，胜负难料，一于玩大啦！

莫耶斯(曼联领队)：大家都知我哋正处于困境，但我已经下定决心要拨乱反正，亦深信球队可以重上正轨，我感受到更衣室所有人都充满决心。

米高卢特立(史云斯领队)：好高兴成为首个喺奥脱福赢曼联嘅史云斯领队，而我真係唔介意成为落井下石嘅一分子，当然，我都好同情行家嘅处境__！